47. วารุณิทูสกชาตกํ
[47]
น เว อนตฺถกุสเลน, อตฺถจริยา สุขาวหา;
หาเปติ อตฺถํ ทุมฺเมโธ, โกณฺฑญฺโญ วารุณิํ ยถาติฯ
วารุณิทูสกชาตกํ สตฺตมํฯ
48. เวทพฺพชาตกํ
[48]
อนุปาเยน โย อตฺถํ, อิจฺฉติ โส วิหญฺญติ;
เจตา หนิํสุ เวทพฺพํ [เวทพฺภํ (สี. ปี.)], สพฺเพ เต พฺยสนมชฺฌคูติฯ
เวทพฺพ [เวทพฺภ (สี. ปี.)] ชาตกํ อฏฺฐมํฯ
49. นกฺขตฺตชาตกํ
[49]
นกฺขตฺตํ ปฏิมาเนนฺตํ, อตฺโถ พาลํ อุปจฺจคา;
อตฺโถ อตฺถสฺส นกฺขตฺตํ, กิํ กริสฺสนฺติ ตารกาติฯ
นกฺขตฺตชาตกํ นวมํฯ
50. ทุมฺเมธชาตกํ
[50]
ทุมฺเมธานํ สหสฺเสน, ยญฺโญ เม อุปยาจิโต;
อิทานิ โขหํ ยชิสฺสามิ, พหุ [พหู (สี. ปี.), พหุํ (ก.)] อธมฺมิโก ชโนติฯ
ทุมฺเมธชาตกํ ทสมํฯ
อตฺถกามวคฺโค ปญฺจโมฯ
ตสฺสุทฺทานํ –
อถ มิตฺตก มาตุ กโปตวโร, ตถา เวฬูก เอฬมูโค โรหิณี;
กปิ วารุณิ เจตจรา จ ปุน, ตถา ตารก ยญฺญวเรน ทสาติฯ
ปฐโม ปณฺณาสโกฯ
6. อาสีสวคฺโค
51.มหาสีลวชาตกํ
[51]
อาสีเสเถว [อาสิํเสเถว (สี. สฺยา. ปี.)] ปุริโส, น นิพฺพินฺเทยฺย ปณฺฑิโต;
ปสฺสามิ โวหํ อตฺตานํ, ยถา อิจฺฉิํ ตถา อหูติฯ
มหาสีลวชาตกํ ปฐมํฯ
52. จูฬชนกชาตกํ
[52]
วายเมเถว ปุริโส, น นิพฺพินฺเทยฺย ปณฺฑิโต;
ปสฺสามิ โวหํ อตฺตานํ, อุทกา ถลมุพฺภตนฺติฯ
จูฬชนกชาตกํ ทุติยํฯ
53. ปุณฺณปาติชาตกํ
[53]
ตเถว ปุณฺณา ปาติโย, อญฺญายํ วตฺตเต กถา;
อาการเณน [อาการเกน (สี. สฺยา. ปี.)] ชานามิ, น จายํ ภทฺทิกา สุราติฯ
ปุณฺณปาติชาตกํ ตติยํฯ
54. กิํผลชาตกํ
[54]
นายํ รุกฺโข ทุรารุโห, นปิ คามโต อารกา;
อาการเณน ชานามิ, นายํ สาทุผโล ทุโมติฯ
กิํผลชาตกํ จตุตฺถํฯ
55. ปญฺจาวุธชาตกํ
[55]
โย อลีเนน จิตฺเตน, อลีนมนโส นโร;
ภาเวติ กุสลํ ธมฺมํ, โยคกฺเขมสฺส ปตฺติยา;
ปาปุเณ อนุปุพฺเพน, สพฺพสํโยชนกฺขยนฺติฯ
ปญฺจาวุธชาตกํ ปญฺจมํฯ